कोशीदेखि गण्डकी प्रदेशसम्म शुक्रबार बिहानैदेखि वर्षा भइरहेको छ। अहिले वर्षा गण्डकीबाट सुदूरपश्चिमसम्म विस्तार भएको छ। गण्डकीबाट पश्चिमतर्फ छिटपुटदेखि हल्का वर्षा भएको छ।
कोशीदेखि गण्डकीसम्म गएराति देखि नै वर्षाको क्रम सुरू भएको थियो। अधिकांश भूभागमा बिहीबारदेखि नै डम्म बादल लागेको छ। गएरातिदेखि भने सिमसिमे झरी परिरहेको छ।
१२ घन्टाको अवधिमा कोशी प्रदेशका एक-दुई ठाउँमा भारी वर्षा पनि मापन भएको छ। जल तथा मौसम पूर्वानुमान महाशाखाले अद्यावधिक गरेको विवरण अनुसार धनकुटाको लेगुवाघाटमा ५२.८ मिलिमिटर वर्षा भएको छ। खोटाङको कुर्लेघाटमा ४८.२ मिलिमिटर वर्षा मापन भएको छ।
कोशी प्रदेशका क्षेत्रहरूमा चौबीस घन्टाको अवधिमा २० देखि ५० मिलिमिटरसम्म वर्षा भएको छ।
काठमाडौं गएरातिदेखि पानी पर्ने र रोकिने क्रम चलिहरहेको छ। बिहानदेखि झरी परिरहेको छ।
बंगालको खाडीमा बनेको चक्रवात 'अर्नब' प्रभाव र पश्चिमी वायुको प्रभावले नेपालको पूर्वदेखि पश्चिमी भूभागमा वर्षा भइरहेको छ।
चक्रवात समुद्री सतहदेखि जमिनी सतहमा प्रवेश गर्दा बलियो न्यूनचापीय क्षेत्रका रूपमा थियो। यो अहिले कमजोर बन्दै नेपालको नजिक आइपुगेको छ।
मौसमविद रोजन लामिछानेका अनुसार भारतको उत्तरप्रदेश आसपास न्यूनचापीय क्षेत्रका रूपमा रहेको छ।
'त्यसको प्रभावले नेपालमा पानी परिरहेको छ। नेपाल आसपास अझै नजिक आउने क्रममा छ,' मौसमविद लामिछाने सेतोपाटीसँग भने।
नेपालमै प्रणाली आउने भने होइन।
'नेपालको अझै नजिक आउँदा रातितिर पानी पर्ने क्रम थप बढ्ने देखिन्छ,' मौसमविद् लामिछानेले भने, 'भारी भनेर त्यस्तो भारी वर्षा होइन। झरी नै पर्ने हो। एक-दुई ठाउँमा भारी वर्षा हुन सक्छ।'
विशेषगरी पूर्वी भूभागहरूमा बढी पानी पर्ने उनले बताए। 'कोशी र बागमती प्रदेशको हिमाली भागहरूमा त्यो सम्भावना देखिन्छ। बेलुका अझै बढ्ने देखिन्छ,' मौसमविद लामिछानेले भने।
विभागका अनुसार राति पनि देशका अधिकांश स्थानमा बदली रहनेछ।
त्रिभुवन विश्वविद्यालयको जल तथा मौसम विज्ञान केन्द्रीय विभागका सह-प्राध्यापक डा. विनोद पोखरेले चक्रवात 'अर्नब' अझै नेपालबाट अझै टाढै रहेको बताएका छन्।
उनले साँझतिर मात्रै उक्त प्रणाली नेपाल नजिक आइपुग्ने बताएका छन्। यसको प्रभावले ५ देखि १० घन्टासम्म भारी वर्षा हुन सक्ने सह-प्राध्यापक पोखरेलले बताए।
'करिब ५–१० घण्टासम्म भारी वर्षा हुन सक्ने देखिन्छ। वर्षाको समय, स्थान र मात्रा फेरिन सक्छन्। विशेषगरी साँझ र राति सतर्क रहँदै आधिकारिक सूचना र अपडेट हेर्नुहोला,' उनले सामाजिक सञ्जालमा लेखेका छन्।
